Poviru jaddu

malatu d’amuri

ca rizzettu nun avi

‘nto to so puddaru,

i so jaddini su tutti aschiuccati

e nun sannu ch’ pisci pigghiari.

P’ la puddina fa chicchirichì

ma chidda è surda

o nun voli sintiri.

Uncia lu pettu,

spampana li pinni,

faci la rota stricannu u tirrenu,

isa la cricchia russa d’arduri,

pizzica, scorcia,

attacca u patruni ,

ca a festa nun ci fa

pirchì pi li jaddini

ci voli sempri un jaddu,

metti di sutta,

strapazza e umilia

tutti li cappuna,

pari ca dici a tutti li jaddini

jo sugnu jaddu!

Ma chistu jaddu nun fa u so misteri

avi quinnici jorna chi nun tocca carni,

e carni di jaddina!

avi sempri ‘nta  menti

la puddina !

Iddu a spia,

ci gira intornu,

si metti pittutu

cu la cravatta

e puru  cu taschinu,

ma nun rinesci a movici

lu cori.

Lu svinturatu

si ‘ncuraggia e pensa

jo sugnu u jaddu

e mettu di sutta

tutti li jaddini.

Ma la puddina no

mancu u talia

e lu jaddu perdi la baldanza

e diventa puddicinu.

Ca nunn’avissi a vista?

Sauta,grira, schiamazza,

vola, casca ,si susi

pari ‘mpazzutu

corpa pi tutti.

Ma la puddina no.

Idda eni biunna

l’occhi cilestri

capiddi ondulati

curti ‘nto coddu,

minni nicuzzi,

cosci di latti,

culu butiru.

C’è gran cunsigghiu

‘nta lu puddaru

è l’assimblea

di tutti li jaddini

fora i cappuna

a fari la guardia

e pirchi nun c’interessa.

Amu a pruvviriri

dici a cinnirusa,

ceni quarcosa

c’avemu a capiri.

Iddu nun mancia,

eni smagrutu,

pari chi chianci

o postu di cantari,

sbagghia li uri

a notti a faci jornu.

Forsi è malatu

dici a russigna,

ca si nun mancia

è malatu di panza.

Ca nun è a panza

ca nun funziona

grira l’andalusa,

c’avi quinnici jorna

ch’ nun tasta pizzu.

N’angina, mali di cori?

Diligaziuni !

Ca  ch’ vuliti

grira lu re

ch’ m’ cuntati

jo sugnu u jaddu

cazzu di diu !

vi mettu in fila

p’ soddisfaziuni.

Ma pensa alla puddina

e tuttu s’arrimodda.

La notti parla

cu l’ursa maggiuri

e ‘nta la luna

si ni voli vulari,

perdi lu cuntu,

eni cunfunnutu,

avi ‘nto pettu

n’accenni addumatu

‘nta bucca surfuru

‘nta l’occhi lacrimi.

Ca nun fussi chiù giuvini

e nun  ci piaciu pi chissu?

Ma la biddizza me

nasci du cantu

di li me paroli,

ca sunnu pinsati e patuti,

ma se chissa nun s’avvicina,

se nun ci pozzu parrari,

nun mi canusci

e nun m’ po’ amari.

Avi tri jorna

ca nun nesci chiù

si ni sta chiusu

‘nta lu jaddinaru.

Nun voli luci

sta sempri allu scuru,

chiama la morti

pi si cunsulari.

Oggi è susutu

pari chiù beddu,

si misi lu vistitu novu

li scarpi allustrati

la giacca a quadri

la cravatta a righi.

Nesci di scattu,

sbatti  la porta,

scansa jaddini,

e curri drittu

unni la puddini.

Signurina scusassi

e ciascuca  la bucca,

signurina scusassi

e ‘ntruzza ‘nte paroli,

jo cun vui aiu na viluntati

e ciassicca  la vuci

‘nta la gorgia.

Nun si scumponi

la virginedda

u varda tuttu,

ci gira ‘ntornu,

ci fa l’esami,

e poi di scattu:

ma leviti i ddocu vecchiu sbiancutu!

Lu sangu ci scenni alli peri

e ciacchiana alla cricchia

milli e chiù voti,

sunnu tuttu nun focu li so carni,

u pizzu ci trema.

Poi si ricorda di essiri re

e cun  un chicchirichì attirrisci puddaru

ci grira in facci:

ma va fanculu oca cretina

mezza jaddina,

tu si puddina,

jò sugnu u jaddu !

e sinni torna

‘nta lu jaddinaru.

Vinni la notti

e lu mattinu prestu

lu suli e la luna

e l’urtimi stiddi

chiancinu e griranu.

Mortu è lu jaddu,

si tirau lu coddu

pi lu gran duluri,

poviru amicu nostru

mortu d’amuri!

!983/84 ?

Ciro Gallo